என் வாசக நட்புகள் அனைவருக்கும் வீனா ஷக்தியின் அன்பு வணக்கங்கள்.
என்னைப்பற்றிச் சொல்ல நான் இன்னும் ஒண்டும் பெருசா சாதிக்கேல. பர்சனலா சொல்லோணும் எண்டா, நான் இலங்கைத் திருநாட்டின் யாழ்ப்பாணத்தைச் சேர்ந்தவள். என்ர கதைல இதுவரைக்கும் இலங்கைத் தமிழ் கொஞ்சி விளையாடினதில்ல. ஆனா என் பேச்சுத் தமிழில் படைப்புகள் படைக்க நிறைய விருப்பம் இருக்கு. அதுக்கான முதல் அடியா இந்த இடத்தில என்னைப் பற்றி என்ர தமிழ்ல சொல்லுறன்.
என்ர இயற்பெயர் பிரவீனா. நான் இருக்கிறது யாழ்ப்பாணத்துல இருக்க ஒரு சின்னக் கிராமத்துல. படிப்பெண்டு சொன்னா ஏலெவல் தான். இந்தியாவில பிளஸ் டூ மாதிரி. அதுக்கு மீறிப் போக ஏலாம போய்ட்டு. இப்பிடி எதிர்காலம் என்ன எண்டு தெரியாம நான் வீட்டோட முடங்கிட்ட நிலமையில தான் பொழுதைப் போக்காட்டவும் சும்மாவே இருக்குறதால வர மன அழுத்தத்துல இருந்து வெளில வரவும் வாசிப்பை எனக்குத் துணையா அறிமுகம் செஞ்சு வச்சா என்ர ஃப்ரெண்ட். அதுக்குப் பிறகென்ன அதிலயே மூழ்கிட்டேன். மூண்டு நேரச் சாப்பாடு மாதிரி எனக்கு ஒருநாளைக்கு ஒரு கதை எண்டாலும் வாசிக்க வேணும். அப்பிடி ஒரு பித்துப் பிடிச்சிட்டு. அந்தப் பித்து எழுதச் சொல்லிச்சு. அதாலயே தத்துப்பித்துனு எழுத வெளிக்கிட்டு இப்ப எழுத்தாளர் என்ற பேரோட சுத்திட்டு இருக்கிறன். ஒண்டுமே இல்லாம அழிஞ்சு போக இருந்தவளுக்கு இந்த அடையாளத்தைக் குடுத்தது வாசகர்களான நீங்க தான்! என்றும் அந்த நன்றியோட உங்கள் விழிகளுக்கு என் எழுத்துக்களை சமர்ப்பிப்பேன்.
